نصائح للمبتدئين في مجال ال Software Engineering

كام نصيحة صغيرة للناس الي بيبتدوا حياتهم في مجال ال Software Engineering وبيلاقوا مشقة وصعوبات يبتدوا شغل او تدريب وبيجيلهم احباط بسبب كده او احساس بالفشل:

  1. الفترة دي صعبة ولو مش قادر تلاقي فرصة دا طبيعي جدا لان معظم الشركات بتجاهد علشان تكمل بآقل خساير او علي الاقل خساير تقدر تتحملها ومش سهل شركات توفر تدريب او تزود مواردها في فترات الازمات والغالبية بيحاولوا يحافظوا علي الوضع كما هو عليه. فالفترة دي مش مقياس ليك تقيم نفسك بناءا عليه.
  2. الناس (الكتير جدا) الي بيختاروا مجال ال UI Development وال Front-End لانه اسهل في التعلم من البرمجة وهيقدروا يلاقوا فرص فيه اسرع للاسف اعتقادهم خطآ, دلوقتي وفي المستقبل وطول الوقت هيكون ال Backend الطلب والاحتياج له دايما اكبر وهيكون دايما مطلوب اكتر. مش لانه اهم. ولكن لان طبيعة الشغل بتحتاج عدد اكبر. صحيح هتتعب شويه في البداية وانت بتتعلم ووانت بتتدرب لكن بعد كده الفرص هتبقي احسن بكتير. ازاي ممكن نقيس دا؟ شوف اي شركة Software تعرفها واسآل علي عدد الناس في التيم الي بتشتغل Ui Development وعدد الناس الي بتشتغل Backend. اقل شئ هيكون ضعف العدد ومعظم الوقت بيكون اضعاف تلت اربع مرات ودا لسبب بسيط، ان المشروع المتوسط الواحد الي بيحتاج اتنين تلاته BackEnd مستحيل يحتاج اكتر من واحد بس Front وبالتالي دايما الطلب علي ال Front هيكون اقل لمصلحة ال BackEnd وبالتالي توفر ال resources هيبقي اكبر في ال Front والمنافسة في المجال هتبقي اصعب علشان يتم اختيارك. يبقي مينفعش تتعلم HTML,CSS,JQuery وتيجي تقول انا مش بلاقي فرص تدريب ليه. دا لان حضرتك مش مميز وفي كتيييير جدا عندهم Skills اكتر بكتير وكمان الطلب علي المجال اقل. بآآختصار للنقطة دي: اختار مجال ال UI او ال FrontEnd لو تقدر وناوي تبقي مميز فيه وتتعلم Skills كتير علي رآسهم ال JS وابنائها والا خليك في ال BackEnd
  3. بنفس المقياس الي فوق الطلب في مجال ال Mobile اقل من الطلب في ال BackEnd ودا بسبب ان اي موبايل ابلكيشن محتاج حد BackEnd والعكس غير صحيح.
  4. مينفعش تخلص كورس اون لاين او اوفلاين بتاع لغة برمجة او لسه متخرج وتدور علي فرصة تدريب او شغل وتزعل لما متلاقيش. بلاش تعتمد ابداً علي دراستك الاكاديمية. هي مهمة لكنها لا تؤهل لسوق العمل للاسف. اما بعد الدراسة تحاول تدخل حاجة زي ITI تجهزك للسوق او تشتغل علي نفسك بكورسات وتدرب نفسك بمشاريع مرة واتنين وتلاته وعشرة وبعدها تشوف فرصة ومتستناش حد ياخدك يدفعلك فلوس ويعلمك لوجه الله. مفيش حد هيقدر يفيدك الا لو يقدر يستفيد منك. دي منفعه متبادلة ولازم يكون عندك حاجه تقدمها قبل ما تستني من اي حد يقدملك حاجه.
  5. تعلم لغة برمجة للاسف في اخر كام سنة مبقاش كفاية علشان تشتغل حتي في الشركات الصغيرة. كل لغة برمجة دلوقتي ليها بعض الملحقات وال Frameworks المشهورة والمتعارف ليها. لازم تدور عليها وتعرفها وتتعلمها وتتدرب عليها مع نفسك ومتعتمدش علي حد.
  6. علم البرمجة لوحدة مش كفاية علشان تكون شاطر وليك فرص افضل. ال Soft-skills علي نفس القدر من الاهمية. وعند بعض الناس وانا منهم هي اعلي في الاهمية. دا هيكون افيد وافضل ليك وللمكان الي انت فيه.
  7. التقليد مش عيب. بالعكس هو بداية الابداع. قلد مشاريع وقلد مهارات وقلد طرق عمل لناس كويسين.
  8. التخطيط والتنظيم والترتيب والوضوح في التعامل هو منهج اي حد شاطر.
  9. في بعض ال skills غير البرمجة مهمة ومطلوبة تبقي عند اي مبرمج لو مش هتتعلمها في البداية لازم يبقي عندك علي الاقل معرفة وعلم بيها. علي سبيل المثال لا الحصر: GIT, Bash, Cloud, Networking, OS, Agile, Test, Problem Solving… وغيرهم لو دورت هتلاقيهم.
  10. دايما قيم نفسك اقل من مستواك وخلي الي قدامك هو الي يديلك قدرك وتقييمك الاعلي. دا احسن بكتير من تقييمك لنفسك اعلي من مستواك والي قدامك يشوفك اقل او اسوء

نشر بواسطة

Hosam Zewain

Software Engineer, Operations Director

hosam@hosamzewain.com

التعليقات

buy anabolic online الخميس أكتوبر 21, 2021

Thanks for the good article, I hope you continue to work as well.


abat4y helal

سامي الثلاثاء مارس 2, 2021

راائع جدا مشكووور


aya ragab

aya الأحد يناير 17, 2021

thank you


اترك تعليقك هنا

لن يتم نشر عنوان بريدك الإلكتروني.


تفاصيل المقالة

فئة Soft Skills Technology الكل
المشاهدات
تاريخ النشر 8 يناير، 2021