التخطيط والتجهيز لحياتك العملية واختيار التخصص المناسب للعمل والتدريب

في المقال دا هنجاوب علي اسآله من نوعية ..

• انا ليه مش بلاقي فرص عمل؟
• ازاي اختار التخصص الي اشتغل فيه؟
• ازاي احدد ال Career path بتاعي؟
• اية الي ممكن اعملة وانا طالب يجهزني لسوق العمل؟
• ازاي يكون عندي فرصة افضل بعد التخرج في الحصول علي وظيفة؟

هنتكلم عن التخطيط والتجهيز لحياتك العملية واختيار التخصص المناسب للعمل والتدريب

لو لسه طالب وفي بداية حياتك العملية دي بعض النصائح الي ممكن تساعدك في التخطيط والتجهيز لما هو قادم والتقديم علي وظائف او تدريب واجتياز الانترفيو

واليكم النصائح عن كيفية التخطيط لمستقبل مهني جيد ملخصة في نقاط:

1. كطالب في الكلية ولسه بتدرس تحدد تخصص واحد وواضح وتكنولوجي ناوي تبدأ بيها حياتك. والتخصص دا يكون هدفك وتركيزك منصب عليه وكل حاحه بتتعلمها او بتمر بيها بتربطها بالتخصص دا. يعني مينفعش تبقي جرافيك ديزينر وباك اند ديفيلوبر واوبر ديرايفر في نفس الوقت. وكيفية اختيار التخصص المناسب في نقطه رقم 2 و 3.
2. لازم تحدد انت ناوي تشتغل فين. مينفعش تسيبها مفتوحة. لازم تكون محدد بناءا علي خططك وظروفك. مثلا ظروفك متسمحش انك تسافر بعيد وانت مقيم في المنصورة يبقي انت هتشتغل في المنصورة. او عاوز تشتغل في مكان فيه شركات ال scale بتاعها اكبر ومفيش عندك مشكلة تروح القاهرة يبقي خلاص حددت لنفسك القاهرة. بعد ما تحدد النطاق الجغرافي هتنتقل لنقطة رقم 3.
3. دور علي الشركات الموجودة في النطاق الجغرافي الي اخترتة واعرفها وتابعها وشوفت الوظايف الي بينزلوها وشوف التخصصات الي بيحتاجوها ولازم تخصصك يبقي واحد منهم. يعني مثلا مينفعش تختار انك تبقي Go develoepr او Scala developer وانت ناوي تقعد في المنصورة لان مفيش شركات هنا بتشتغل GO. يبقي ضيعت وقتك وهتقعد تلعن الظروف الي مخلياك مش لاقي شغل ولا تدريب. مانت الي مخترتش صح. اختار التخصص الي يعجبك بشرط يكون مطلوب من الشركات الي في النطاق الجغرافي الي ناوي تشتغل فيه.
4. بما انك قدرت تحدد هتشتغل ايه لازم تعمل لنفسك ساعات للمذاكرة غير اوقات الدراسة في التخصص الي اخترتة. تاخد كورسات وتذاكرها وتطبق عليها. تعمل مشاريع. ولازم يبقي عندك github اكونت عليه شغلك. اياك والاعتماد علي الكلية فقط انها تأهلك لسوق العمل، لو عملت كده هتتخرج تتفاجئ انك كل الي معاك مجرد اساسيات والسوق مختلف وهتضطر تبدأ تذاكر من الصفر علشان تلاقي فرصة تدريب مش فرصة شغل وهيكون صعب جداً.
5. جهز CV محترم مرتبط بتخصصك متكدبش في اي معلومة فيه وجزء ال experience الي هيبقي فاضي تكتب فيه المشاريع الي اشتغلت فيها مع نفسك ولينكاتها وال Skills تبقي واضحة متجيبش Skills من الشرق والغرب وحجات ملهاش علاقة ببعض. تحديداً ال technical skills. لو ناوي علي سبيل المثال تشتغل backend laravel developer ال skills هتبقي laravel و php وكل ماهو متعلق بيهم بس متضيفش معاهم .net و android و frontend. دا بيحسس الي بيشوف ال cv انك مش صادق وكاتب اي كلام او انك فهلوي وبتاع كله مش هتبقي مركز ولا شاطر وطبعا هيستبعد ال cv. احرص ام الcv كلة يبقي مرتبط بتخصصك سواء التايتل الي تحت اسمك او الكورسات الي خدتها او الخبرات السابقة او ال Skills الي عندك.

– خلصنا مرحلة التمهيد ندخل في مرحلة الانترفيو. ودي فيها امور كتير بس خلينا في المهم في انترفيو ال internship:

1. هتتسأل غالبا انت مقدم في التدريب دا ليه خلي اجابتك تبين انك مش مقدم علشان الاعلان جه قدامك فقدمت ايا كان التدريب دا ايه او فين او حد قدملك. لازم تبين مدي اهتمامك بالتدريب علشان تكسب خبرة للشغل واهتمامك بالتخصص الي فيه التدريب وانك بتجهز نفسك له من زمان ومتحمس تتدرب فيه وتطبق الي ذاكرته واتعلمته.
2. اتكلم عن الكورسات الي خدتها والحجات الي عملتها والمشاريع الي طبقتها والتكنولوجي الي بتستخدمها.
3. بلاش تهتم بالفلوس في مرحلة التدريب او في اول سنة في حياتك العملية عموماً. الفلوس هتيجي هتيجي ان شاء الله لو بقيت شاطر وبقي عنده خبرة فبلاش تستعجل عليها لحد ما تحصل علي الخبرة دي.